Bisan pa nga sia nagakandidato para sa ikatlo kag hingapusan nga termino bilang konsehal sa siudad sang Iloilo, wala naga kahulugan nga mauntat man ang iya panghimanwa.
“Padayon gihapon ang aton serbisyo sa tawo mientras tanto nga ginabugayan kita sang Ginuo, sa pribado man ukon sa aton pag-alagad sa gobierno,” paathag ni Atty. Romel Duron sa coffee shop interview sang HilwayNews sing Domingo, Abril 20.
Si Duron nagapapili sa iya ikatlo nga termino karon nga eleksyon sang Mayo 12, 2025 upod sa Team Uswag ni Mayor Raisa Trenas, Vice Mayor Jeffrey Ganzon kag 12 ka konsehales.
Sing nagligad nga 2 ka termino bilang konsehal, duha ka importante nga komite ang iya ginpangunahan – transportasyon kag nian energy kag public utilities.
Talalupangdon ang ginpahamtang nga mga pagsulondan paagi sa mga ordinansa nga gindihon ni konsehal Romel Duron agud mangin gabayan sa pagpatuman sang Local Public Transport Regulation Plan, kag ang pag-umpisa sang Underground Cabling System sa kalye Real.
