‘WALA KO KABALASLAN SA LOPEZES’

Senator Franklin Drilon

Ang Ilongo nga senador, si Franklin Drilon nagsabat sa atake ni Pres. Rodrigo Duterte nga sia manog-dampig sang pamilya Lopez.

Si Drilon nagpahayag kaina sa programa sang DYFM Bombo Radyo nga sia naga-apin sa kinamatarung sang hilway nga pagbantala, kag sa kabuhian sang 11,000 ka mga naga-obra sa ABS-CBN.

Ginmulay ni Duterte si Drilon sa State Of the Nation Address (SONA) sining Lunes, Hulyo 27. Sunu sa Presidente si Drilon manog-apin sang “oligarch” nga Lopezes bangod sang pagkontra niya sa pagpasira sang “Kapamilya network.”

Si Drilon nangin kaundan sa imbukada kag hingapusan nga mga bahin sang SONA ni Duterte.

Ang Presidente nagpuntariya man kay Drilon bilang isa sang mga utok sa bangi-an nga mga kontrata sa tubig sang mga Ayala kag ni Manuel Pangilinan didto sa Metro Manila.

“Wala ko hinalung-ong sini kag bisan landong sang mga kontrata wala ko makita,” paathag ni Senador Drilon.

Sa interview ginpahibalo man ni Drilon nga ang pagtukod sang taytay nga maga-angot sang Panay kag Guimaras “dili na masugdan sa idalum sini nga administrasyon.”*

Leave a Reply

Your email address will not be published.