Unahon ta anay ang bakuna – Drilon

Senator Franklin Drilon

Maga-agi sa ma-idid nga pagrepaso ang P19 Bilyones nga pundo para sa “anti-insurgency campaign” ni Pres. Duterte.

Ini ang panindugan ni Senador Franklin Drilon sa interview sang Bombo Radyo Iloilo kaina bahin sa pundo nga napaidalum sa 2021 National Expenditure Program sang gobierno.

Ang P4.5 Trilyones nga NEP pagatalakayon sang Senado sa masunod nga semana. Kon mapasar sa Kongreso ini mangin General Appropriations Act para sa tuig 2021.

“Mas kinahanglan ta subong ang pundo para ibakal sang bakuna (sa COVID-19). Sunu sa Dep’t of Health (DOH) dapat bakunahan ang 30 milyones ka mga Pilipino agud matigayon naton ang immunity.”

Dugang pa ni Drilon: ginsiling sang DOH nga US5 Dolares ang bili sa kada tublok sang bakuna kag duha ka tublok ang kinahanglanon sa tagsa ka gina-bakunahan.

Gintumod man ni Drilon nga sa baylo sang plano nga mangutang US9 Bilyones Dolares ang gobierno, mas maayo kon madugangan pundo ang programa sa pagbakuna gikan sa P19 Bilyones nga anti-insurgency budget.

Leave a Reply

Your email address will not be published.