Para sa mga Ilonggo nga may huyog sa pagpatikang bilang kabuhian imbes sang pagpang-empleyo, ginapulido nian ni Konsehal Miguel Treñas agud ipasar sa Konseho ukon Sangguniang Panlungsod (SP) ang Ordinansa nga magahatag sing pat-ud nga salandigan legal sa ‘Uswag Negosyo Academy’.
Ining ginapreparar nga Bill mangin katuwang sang Nano Enterprise Incentives Ordinance nga ginpasar man ni Treñas sing Nobiembre 2025. “Ang Nano Ordinance makahatag sa magagmay nga Start-Ups sing asta 100% nga tax incentives sa una nga tuig sang pagpatikang,” siling ni Migs.
Sa tion nga mapasar na ang Ordinansa sa Uswag Negosyo, may paghanas sa mga pumalasakop agud magiyahan sila sang kinahanglanon – city permits, bookeeping kag iban pa nga tulumanon. May giya man kag dugang nga capital halin sa opisina sang Local Enterprise Development and Investment Program (LEDIP) sang siudad, paathag ni Konsehal Migz Treñas.
Kon madumduman, ang Uswag Negosyo Academy nangin kabahin sang madamu nga mga programa sa una nga tuig ni Mayor Raisa Treñas. (HilwayNews)
