Nagpirma sining Hulyo 1, 2025 ang MORE Electric and Power Corporation (MORE Power) sing bag-o nga Power Supply Agreement (PSA) nga nakatalana magdugang sang 6.6 megawatts (MW) nga clean energy para sa Renewable Portfolio Standard (RPS).
Ang Renewable Portfolio Standard tulumanon sa idalum sang Republic Act 9513 nga nagamandu sa electric power industry nga malab-ot ang ginatumod nga 50% sang power supply mix magikan sa renewable energy sugod tuig 2030.
Ginpirmahan ang kasugtanan sa tunga sang Presidente kag CEO sang MORE Power nga si Roel Z. Castro kag Alfonso Javier D. Reyes, Presidente sang Urban Energy Development Corporation (UEDC), subsidiary sang MabuhayPower Holdings Corp.
Sandig sa kasugtanan magahatag sang 6.6 MW nga supply sang kuryente ang Urban Energy Development Corporation halin sa 8-MW-peak solar power plant sini nga nakatalana ipatindog sa banwa sang Anilao karon nga tuig.
